«Ուիգմոր կանանց և երեխաների հիվանդանոց»-ը
հայտնում է սեպտեմբերի 14-ին մանկական վիրաբուժության բաց դռների
օրվա անցկացման մասին։ Նշված օրը մասնագետների խորհրդատվությունները կատարվելու են
անվճար և առանց ուղեգրի։ Բաց դռների օրերի նախնական հերթագրումների գրանցումները իրականացվում
են +374 12 34 56 78 հեռախոսահամարով։
«Բաց դռների օրերը Ուիգմորի հայեցակարգի մի մասն են կազմում՝ հնարավորություն
ստեղծելով բուժառուների համար տեղում ծանոթանալ անձնակազմին, հիվանդանոցի
տեխնիկական հագեցվածությանը և մեզ մոտ ընդունված բուժման առանձնահատկություններին
և մեթոդներին», - նշում է մանկական վիրաբույժ, մանկական վիրաբուժության
ծառայության պատասխանատու Արա Կարապետյանը։
«Այս կոնտեքստում հատուկ կառանձնացնեի անհետաձգելի վիրաբուժությունը.
անհետաձգելի դեպքերի ամենամեծ դժվարությունը պլանավորման բացակայությունն է․
առաջին պլանում է թիմի փորձառությունը, հիվանդանոցի հագեցվածությունը և արագ,
կոմպետենտ գործելու ունակությունը։ Անհետաձգելի վիրաբուժության մեջ ընդամենը մի
քանի րոպեն երեխայի կյանքի համար որոշիչ կարող է լինել», - նշում է Արա
Կարապետյանը։
Բաց դռների օրվան ընդառաջ վիրաբուժական թիմը պատմում է, որ Ուիգմորում լայնորեն
կիրառվում է վիրահատությունների լապարասկոպիկ մեթոդը․ կարևոր ձեռքբերում է
համարվում քիմիաթերապևտիկ բուժում ստացած երեխաների ուռուցքների հեռացումը, դժվար
հասանելի ուռուցքների բիոպսիան՝ մինչև քիմիոթերապիան, որովայնի և կրծքավանդակի
տարբեր տեղակայման էխինոկոկային բշտերի հեռացումը լապարասկոպիկ և թորակոսկոպիկ
եղանակով։
Լապարասկոպիկ վիրահատությունները կիրառվում են նաև ձվարանի փողի ոլորքի,
ձվարանի կիստաների, դեռահաս աղջիկների կոնքի օրգանների տարբեր տեսակի բարորակ և
չարորակ գոյացությունների վարման ժամանակ:
«Նախկինում երեխաները վիրահատվում էին մեծ կտրվածքների միջոցով, սակայն մենք
Ուիգմորում առաջնորդվում ենք աշխարհում ընդունված մինիմալ ինվազիվ
միջամտությունների ստանդարտով», - նշում է Արա Կարապետյանը։
«Լապարասկոպիայի՝ որովայնի խոռոչի բոլոր հատվածները բարձր որակի
վիզուալիզացիայի և սանացիայի հնարավորությունը, կրճատել է հետվիրահատական
բարդությունների առաջացումը․ չկա վիրահատական վերք, չկա պոտենցիալ բորբոքային
ընթացք», - բացատրում է Արա Կարապետյանը։
Լապարասկոպիկ մեթոդով Ուիգմորում լուծվում են նաև լյարդի, լեղուղիների,
լեղապարկի հետ կապված հիվանդությունները։
Մասնագետը նշում է, որ թիմի առանձնահատկություններից է նաև շնչառական համակարգի
վիրաբուժական խնդիրների վարումը։ Ախտորոշիչ, ինչպես նաև բուժական նպատակով
կատարվում է բրոնխոսկոպիա (ֆիբրոբրոնխոսկոպիա և ռիգիդ՝ կոշտ), թորակոսկոպիկ
միջամտություններ, օրինակ՝ բարդացած թոքաբորբերի վարման ժամանակ։ Անհետաձգելի
բուժօգնության բաժանմունք հաճախ դիմում են երեխաներ՝ շնչուղիներում օտար մարմնի
կապակցությամբ․ այս օտար մարմինների հեռացումը նույնպես կատարվում է
բրոնխոսկոպի միջոցով։
Հիվանդանոցում շարունակաբար զարգանում է նաև նորածնային
վիրաբուժությունը․ Ուիգմորում գործում է բարձր տեխնիկական հագեցվածությամբ
նորածնային վերակենդանացման բաժանմունք: Վիրաբուժական թիմը իրականացնում է
նորածնային վիրահատություններ, անհաս երեխաների վիրահատություններ և զարգացման
տարբեր արատների շտկումներ։
Հիվանդանոցում ասում են, որ բաց դռների ձևաչափի ընդունելությունների ձևավորվող
ավանդույթի երկարաժամկետ նպատակը հիվանդանոցի թիմի կողմից որդեգրված առաքելության
իրականացումն է՝ բարձրորակ բուժսպասարկումը իրական և հասանելի դարձնել Հայաստանի
բոլոր երեխաների համար։
Ուիգմոր կանանց և երեխաների հիվանդանոցը Երևանում տեղակայված, 220 մահճակալ
կարողությամբ հագեցած բժշկական կենտրոն է, որի աշխատանքի հիմքում երեխաներին և
կանանց համապարփակ, մատչելի և բարձրորակ առողջապահական ծառայություններ մատուցելու
մշակույթն է։ ՀՀ առողջապահության նախարարի 2023 թվականի հուլիսի 6-ի թիվ 3350-Ա
որոշման համաձայն՝ «Ուիգմոր կանանց և երեխաների հիվանդանոց»-ն արժանացել
է մանկական խնամքի երրորդ բարձրագույն մակարդակի: Ընդունելով ընտանիքներ
հանրապետության ողջ տարածքից՝ Ուիգմորը տրամադրում է միջազգային չափանիշներին
համապատասխան ընդհանուր մանկաբուժական, նեղ մասնագիտական մանկական
ծառայություններ, ինչպես նաև կանանց առողջությանն ուղղված և ծննդօգնության
ծառայություններ:
Լրացուցիչ տեղեկությունների համար այցելեք www.wigmore.am կայք։
