ՊԼԱՍՏԻԿ ՌԵԿՈՆՍՏՐՈՒԿՏԻՎ ՎԻՐԱԲՈՒԺՈՒԹՅԱՆ ԵՎ ՄԻԿՐՈՎԻՐԱԲՈՒԺՈՒԹՅԱՆ ԾԱՌԱՅՈՒԹՅՈՒՆ

Ուիգմոր Կանանց ԵՎ Երեխաների Հիվանդանոց

Ծառայություններ

«Ուիգմոր կանանց և երեխաների հիվանդանոց» բազմապրոֆիլ բժշկական կենտրոնում գործում է ռեկոնստրուկտիվ վիրաբուժության և միկրովիրաբուժության ծառայությունը։

Թիմը անհետաձգելի միկրովիրաբուժական օգնություն է ցուցաբերում վերջույթների մանր և խոշոր անոթների, ծայրամասային նյարդերի, ջլերի վնասումներով, ինչպես նաև մասնակի կամ լրիվ անդամահատումներով 0-18 տարեկան երեխաներին։

Կատարվում են պլաստիկ-վերականգնողական պլանային վիրահատություններ վերջույթների և մարմնի տարբեր մասերի բնածին տարբերությունների ու արատների և կոպիտ հետվիրահատական կամ հետայրվածքային սպիների դեպքում, ինչպես նաև մաշկային և փափուկ հյուսվածքային նորագոյացությունների հեռացում և դրա հետևանքով առաջացած ծածկույթային դեֆեկտների պլաստիկա։

Պլաստիկ վերակառուցողական վիրաբուժության և միկրովիրաբուժության ծառայությունը մատուցում է բարձրորակ բժշկական օգնություն՝ համագործակցելով արտերկրի մի շարք առաջատար կլինիկաների և մասնագետների հետ, այդ թվում.

Լիոնի Էդուար Էրիո հիվանդանոցի (Ֆրանսիա) վերին վերջույթի օրթոպեդիկ վիրաբուժության բաժանմունքի վարիչ, աշխարհահռչակ պրոֆեսոր Արամ Ղազարյանի հետ համատեղ կատարվում են բազկահյուսակի ծննդաբերական կաթվածով նորածինների և մանկահասակ երեխաների ծայրամասային նյարդերի վերականգնողական վիրահատություններ, որոնց ժամանակ «նյարդային սոսնձի» միջոցով կարող են վերականգնվել մինչև 1մմ-անոց նյարդաթելեր։
Լոս Անջելեսի (ԱՄՆ) անվանի հայազգի պլաստիկ վիրաբույժ Անդրե Փանոսյանի հետ համատեղ Ohana One International Surgical Aid ծրագրի շրջանակներում իրականացվում են հեռավար վիրահատություններ VUZIX M400 «խելացի» ակնոցի կիրառմամբ, որի շնորհիվ բժիշկ Փանոսյանն աշխարհի ցանկացած կետից կարողանում է հետևել վիրահատության ողջ ընթացքին:
Սթենֆորդի համալսարանի (ԱՄՆ) ձեռքի վիրաբուժության թիմի հետ։

Ծառայությունը զբաղվում է վնասվածքների, բնածին տարբերությունների ու արատների և ձեռքբերովի խնդիրների բուժմամբ՝ ապահովելով ֆունկցիոնալ և էսթետիկ բարելավում։

Իրականացվում են.

Մաշկային և փափուկ հյուսվածքային գոյացությունների հեռացում,
Վնասվածքներից հետո ֆունկցիայի վերականգնում,
Ծայրամասային նյարդանոթային խրձերի և ջլերի թարմ և հնացած վնասվածքների վերականգնում,
Բազկահյուսակի ծննդաբերական և հետվնասվածքային կաթվածի վիրահատական բուժում,
Գլխի ու վերջույթների բնածին տարբերությունների և արատների վիրահատական շտկում,
Սպիների և հյուսվածքային ձևախախտումների (դեֆորմացիաների) վիրահատական շտկում,
Մատների և վերջույթների վերականգնում՝ վնասվածքային անդամահատումների դեպքում,
Մատների, նախադաստակի և դաստակի ոսկրերի կոտրվածքների վերականգնում,
Նյարդերի ճզմման (թունելային) համախտանիշների պահպանողական և վիրահատական բուժում,
Էսթետիկ միջամտություններ։